ਅੰਮ੍ਰਿਤਸਰ, 12 ਜੂਨ,
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਅਤੇ ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਅੱਜ ‘ਈਜ਼ੀ ਜਮ੍ਹਾਂਬੰਦੀ’ ਪੋਰਟਲ ਦੀ ਸ਼ੁਰੂਆਤ ਕੀਤੀ, ਜਿਸ ਨਾਲ ਪੰਜਾਬ ਨੇ ਨਾਗਰਿਕਾਂ ਨੂੰ ਭ੍ਰਿਸ਼ਟਾਚਾਰ ਮੁਕਤ, ਸੁਚਾਰੂ, ਪਰੇਸ਼ਾਨੀ ਰਹਿਤ ਅਤੇ ਪਾਰਦਰਸ਼ੀ ਸੇਵਾਵਾਂ ਪ੍ਰਦਾਨ ਕਰਨ ਵਿੱਚ ਨਵੀਂ ਸਫਲਤਾ ਹਾਸਲ ਕੀਤੀ ਹੈ।
ਦੋਵਾਂ ਨੇਤਾਵਾਂ ਨੇ ਕਿਹਾ ਕਿ ਇਸ ਪਹਿਲ ਨਾਲ ਮਾਲ ਵਿਭਾਗ ਦੀਆਂ ਮੁੱਖ ਸੇਵਾਵਾਂ ਵਿੱਚ ਭ੍ਰਿਸ਼ਟਾਚਾਰ ਨੂੰ ਜੜ੍ਹੋਂ ਖਤਮ ਕਰਨ ਲਈ ਇੱਕ ਇਤਿਹਾਸਕ ਕਦਮ ਚੁੱਕਿਆ ਗਿਆ ਹੈ, ਜਿਸ ਨਾਲ ਲੱਖਾਂ ਲੋਕਾਂ ਨੂੰ ਸਿੱਧਾ ਲਾਭ ਮਿਲੇਗਾ। ਉਨ੍ਹਾਂ ਨੇ ਜ਼ਿਕਰ ਕੀਤਾ ਕਿ ਪਿਛਲੇ ਦਿਨੀਂ ਸ਼ੁਰੂ ਕੀਤੀ ‘ਈਜ਼ੀ ਰਜਿਸਟਰੀ’ ਨੇ ਜਾਇਦਾਦ ਰਜਿਸਟਰੀ ਨੂੰ ਸਰਲ ਅਤੇ ਪਾਰਦਰਸ਼ੀ ਬਣਾਇਆ, ਜਿਸ ਨਾਲ ਮੋਹਾਲੀ ਵਿੱਚ ਭ੍ਰਿਸ਼ਟਾਚਾਰ ਦੀ ਕੋਈ ਸ਼ਿਕਾਇਤ ਨਹੀਂ ਆਈ। ਇਹ ਸੇਵਾ 15 ਜੁਲਾਈ ਤੱਕ ਪੂਰੇ ਪੰਜਾਬ ਵਿੱਚ ਲਾਗੂ ਹੋ ਜਾਵੇਗੀ।
ਉਨ੍ਹਾਂ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਨੇ ਭ੍ਰਿਸ਼ਟਾਚਾਰ ਮੁਕਤ ਸ਼ਾਸਨ ਦਾ ਵਾਅਦਾ ਕੀਤਾ ਸੀ, ਅਤੇ ‘ਈਜ਼ੀ ਜਮ੍ਹਾਂਬੰਦੀ’ ਇਸ ਦੀ ਮਿਸਾਲ ਹੈ। ਇਹ ਪੋਰਟਲ ਪੰਜ ਮੁੱਖ ਸੇਵਾਵਾਂ ਦੇਵੇਗਾ: ਵਟਸਐਪ ’ਤੇ ਜਮ੍ਹਾਂਬੰਦੀ, ਇੰਤਕਾਲ, ਰਪਟ ਐਂਟਰੀ, ਅਤੇ ਫਰਦ ਬਦਰ (ਜ਼ਮੀਨ ਰਿਕਾਰਡ ਸੁਧਾਰ) ਲਈ ਆਨਲਾਈਨ ਸਹੂਲਤਾਂ। ਵਟਸਐਪ ਰਾਹੀਂ ਜਮ੍ਹਾਂਬੰਦੀ ਨਾਲ 40 ਲੱਖ ਲੋਕਾਂ ਨੂੰ ਸਹੂਲਤ ਮਿਲੇਗੀ, ਜਿਨ੍ਹਾਂ ਨੂੰ ਪਹਿਲਾਂ ਪਟਵਾਰੀ ਜਾਂ ਫਰਦ ਕੇਂਦਰਾਂ ਦੇ ਚੱਕਰ ਕੱਟਣੇ ਪੈਂਦੇ ਸਨ। ਹੁਣ ‘ਈਜ਼ੀ ਵੈੱਬਸਾਈਟ’ ’ਤੇ ਵੇਰਵੇ ਦਰਜ ਕਰਕੇ ਮੁਫਤ ਜਮ੍ਹਾਂਬੰਦੀ ਮਿਲੇਗੀ, ਜਿਸ ’ਤੇ ਡਿਜੀਟਲ ਦਸਤਖਤ ਅਤੇ QR ਕੋਡ ਹੋਵੇਗਾ। ਪੰਜਾਬ ਦੇ 99% ਪਿੰਡਾਂ ਦਾ ਜ਼ਮੀਨੀ ਰਿਕਾਰਡ ਡਿਜੀਟਾਈਜ਼ ਹੋ ਚੁੱਕਾ ਹੈ, ਅਤੇ ਬਾਕੀ ਦੋ ਮਹੀਨਿਆਂ ਵਿੱਚ ਡਿਜੀਟਾਈਜ਼ ਹੋ ਜਾਣਗੇ।
Watch…..https://www.youtube.com/watch?v=QJB-X2Rjh-c
ਆਨਲਾਈਨ ਇੰਤਕਾਲ ਬਾਰੇ ਉਨ੍ਹਾਂ ਦੱਸਿਆ ਕਿ ਸਾਲਾਨਾ 8 ਲੱਖ ਇੰਤਕਾਲ (6 ਲੱਖ ਰਜਿਸਟਰੀ ਤੋਂ ਬਾਅਦ, 2 ਲੱਖ ਵਿਰਾਸਤੀ) ਹੁੰਦੇ ਹਨ। ਹੁਣ 30 ਦਿਨਾਂ ਅੰਦਰ ਆਟੋਮੈਟਿਕ ਇੰਤਕਾਲ ਹੋਵੇਗਾ, ਅਤੇ ਵਟਸਐਪ ਰਾਹੀਂ ਅਪਡੇਟ ਮਿਲੇਗਾ। ਰਪਟ ਐਂਟਰੀ ਲਈ 2 ਲੱਖ ਇੰਦਰਾਜ ਸਾਲਾਨਾ ਹੁੰਦੇ ਹਨ, ਜੋ ਹੁਣ ਡਿਜੀਟਲ ਰੂਪ ਵਿੱਚ ਅਦਾਲਤੀ ਹੁਕਮਾਂ ਲਈ 1 ਦਿਨ ਅਤੇ ਕਰਜ਼ਿਆਂ ਲਈ 7 ਦਿਨਾਂ ਵਿੱਚ ਪੂਰੇ ਹੋਣਗੇ। ਫਰਦ ਬਦਰ ਲਈ 60,000 ਅਰਜ਼ੀਆਂ ਸਾਲਾਨਾ ਆਉਂਦੀਆਂ ਹਨ, ਜੋ ਹੁਣ 15 ਦਿਨਾਂ ਵਿੱਚ ਆਨਲਾਈਨ ਪੂਰੀਆਂ ਹੋਣਗੀਆਂ।
“ਆਪਣੇ ਜ਼ਮੀਨੀ ਰਿਕਾਰਡ ਲਈ ਸਬਸਕ੍ਰਾਈਬ ਕਰੋ” ਸੇਵਾ ਨਾਲ NRI ਭਾਈਚਾਰੇ ਨੂੰ ਲਾਭ ਹੋਵੇਗਾ। ਸਾਲਾਨਾ 500 ਰੁਪਏ ਪ੍ਰਤੀ ਖੇਵਟ ਦੀ ਫੀਸ ਨਾਲ ਜ਼ਮੀਨ ਮਾਲਕ ਨੂੰ ਛੇੜਛਾੜ ਦੀ ਸੂਚਨਾ ਵਟਸਐਪ ਜਾਂ ਈਮੇਲ ਰਾਹੀਂ ਮਿਲੇਗੀ, ਜਿਸ ’ਤੇ ਉਹ ਆਨਲਾਈਨ ਇਤਰਾਜ਼ ਦਰਜ ਕਰ ਸਕਦੇ ਹਨ।
ਹੁਣ ਲੋਕ easyjamabandi.punjab.gov.in ’ਤੇ ਜਾ ਕੇ ਜਾਂ 1076 ’ਤੇ ਡਾਇਲ ਕਰਕੇ ਇਹ ਸੇਵਾਵਾਂ ਆਸਾਨੀ ਨਾਲ ਪ੍ਰਾਪਤ ਕਰ ਸਕਦੇ ਹਨ।
